Gutháin Chliste agus Táibléid ag cruthú fadhbanna do mheabhair sláinte i bpáistí chomh hóg le 2 bhliain d'aois

Tá an rabhadh faighte againn le tamall anuas ó na saineolaithe, go bhfuil táibléid agus gutháin chliste ag cruthú fadhbanna meabhair sláinte i bpáistí chomh hóg le dhá bhliain d'aois. 'Sé a dhóthain de, ag caitheamh uaire in aghaidh an lae ag stánadh ar scáileán chun an seans a ardú don pháiste a bheith ag mothú níos imníche nó faoi ghruaim.

Maíonn tuairisc ón DailyMail le déanaí go bhfuil seans ann go bhfuil nasc idir am scáileáin agus easpa fiosrachta, easpa cumais tascanna a chríochnú, níos lú féinsmachta, agus dochar déanta dá seasmhacht i ndaoine óga. Cé go bhfuil déagóirí sa chatagóir is contúirtí ó thaobh teagmhála de, tá sé den tuairim anois go bhfuil daltaí faoi deich mbliana d'aois le hinchinní fós ag forbairt sa bhearna baoil.

Cruthaíonn taighde atá déanta ag dhá ollscoil i Meirceá; Ollscoil stáit i San Diego agus Ollscoil Georgia, go gcaitheann roinnt páistí suas go cúig uair an chloig go laethúil ag féachaint ar ghléasanna digiteacha. Deir taighdeoirí go bhfuil an t-am caite ag déagóirí agus páistí ag féachaint ar ghléasanna dáiríre ach inseachanta chomh maith mar ionchur ar an sláinte meabhrach.

Forbraíonn leath de na fadhbanna sláinte meabhracha roimh an ógántacht, ach is léir go bhfuil géarghá ann na cúinsí atá nasctha d’fhadhbanna den saghas seo sa daonra a aithint agus a iniúchadh. Tá sé beagnach dodhéanta tionchar a bheith orthu, ach níos fusa fós iompar i bpáistí a athrú. Tá dualgas ar thuismitheoirí ar an gcéad dul síos agus ar mhúinteoirí ar an dara dul síos an méid ama a chaitheann déagóirí agus páistí ar líne agus ag féachaint ar an teilifís a shrianadh agus a ghearradh síos fad is atá siad ag staidéar, ag ithe agus fiú ag imirt spóirt lena gcairde. Tá nósanna na bpáistí ag athrú, agus bíonn sé de bhrionglóid anois ag gasúir óga a bheith ina 'Youtuber' sula gcuirfeadh siad geansaí peile Manchester United orthu.

Ó thaobh na taighde atá déanta air seo, tá méadú fá dhó den seans go mbeadh déagóirí faoi ghruaim nó ag fulaingt de mhíshuaimhneas dá mba rud é go gcaitheann siad seacht n-uair an chloig ós comhair scáileáin. D'aimsigh staidéir chomh maith go bhfuil naisc láidre ann idir fholláine agus am scáileáin i measc na n-ógánach. Deirtear go bhfuil ceangail níos treise idir an méid ama a chaitear ar na meáin shóisialta i gcomparáid lena bheith ag féachaint ar fhíseáin agus scannáin.

Aithnítear go raibh dhá sheans níos mó ag páiste faoi chúig a bhí ina ard úsáideoir de theicneolaíocht éirí teasaí. Anuas air sin ba bheagnach mar an gcéanna nach raibh siad in ann iad féin a shocrú dá mba rud é gur éirigh siad oibrithe. Níl aon agó ach go bhfuil méid an ama a chaitear leis na gléasanna ag ardú, níl a mhalairt ag tarlú, agus ní fhéachann sé go bhfuil athrú chun tarlú go luath. Roimhe seo, bhí na tuairiscí a tháinig amach measctha, ach tá gort an taighde i bhfabhar an méid ama a laghdú ag fás as cuimse le gairid anuas. Níor tharla sé ach an bhliain seo gur rangaigh an Eagraíocht Dhomhanda Sláinte neamhord cluichíochta ar an aicmiú idirnáisiúnta de ghalair. Níl leigheas ag teacht ar an bhfadhb dár ndóigh.

D’fhógair na saineolaithe a rabhaidh faoi na handúiligh óga seo, go bhfuil i mbaol de neamhchodladh, mhurtall, chibearbhulaíocht agus ag cailliúint scileanna sóisialta luachmhara le heaspa cumarsáide a dhéanamh le daoine go laethúil. In am an ghátair atáimid i láthair na huaire, agus gan ghníomhartha, is ag snámh in aghaidh easa a bheimid i gceann bliana nó dhó. Níl aon mhaith sa seanchas nuair atá an anachain déanta.

Tháinig roinnt de na tuairimí atá thuas bunaithe ar alt a

fhoilsíodh ag an NZHearald ar an 13ú Samhain 2013

https://www.nzherald.co.nz/lifestyle/news/article.cfm?c_id=6&objectid=12154228&fbclid=IwAR3W_74gmI-Z9DsyQxV02ACvQDx1O92qsVG-xJve1Ma4Kxal4tZ84MMFX9A